"WAAA! MME PENZAVO CHE FOSSE SUCCIESO!" di Angela Quattromani.

Ampresso, ampresso! - Currite, currite!- 
Ma ch' è stato, chi è stato?

Cchiù sentevo sti vvoce e cchiù mme cunfunnevo!
Currevo annanzo, areto, saglievo, scennevo.
Insomma, nun ce capevo cchiù nniente.
Ero china 'e paura!

Po', mme sfasteriaje, mme fermaije, m' assettaije
e cercaije 'e 'nce capì quaccòsa.

Alla fine, ch' era succieso?

'A gatta da' vammana,
senza reticenza, 
s' era accoppiata co' gatto do barbiere
e aveva parturito sei gattini.

Accussì, mentre 'e ccosce ancora mme tremmavano,
diciette:-Waaa! Mme penzavo che fosse succieso!