"MADO', QUANTA RESATE MME FACEVO!" di Angela Quattromani

'A casa mija aveva due uscite:
una sulla piazza principale, l' altra in un vicolo.
Ijo, nun mme sentivo 'na Venere, ma 'nce sapevo fa.
I corteggiatori erano tanti e sapite pecchè, 
pecchè 'e cose desiderate so' sempe 'e cchiu belle.

Nun permettevo a nisciuno 'e s' avvicinà cchiù 'e tanto
e si qualcuno 'nce pruvava, 

abbassavo 'a capa e mme facevo cchiù 'a llà.

Ma turnammo a nnuije. O' mese 'e Maggio scennevo p' 'a Messa.
Passavo p' 'a piazza e vicino a' 'n albero appuiato, 

'nce steve sempe qualcuno a suspirà.

Appena mme vedeva, scattava sull' attenti. 

Po' mme seguiva co' sguardo, senza s' avvicinà.
E llà restava, facenno o' cuollo luongo pe' mme vedè e turnà.

Si o' guaglione mme piaceva, turnavo sempe pe' llà,
ma, si nun m' attirava, comm' a' gatta marpione,
mme ne ijevo po' vicolo, senza mme fa nutà.

Appena mmiezo 'e scale 'e casa mia, 

Madò, qunta resate mme facevo
e mmia cuggina, ca sapeva o fatto, spisso diceva:
-Attienta a tte pecchè primma o poi, t' 'o fanno pagà.