" 'O SOLE SENTE CAVERE E VVO' 'NA LIMUNATA!" di Angela Quattromani.

-Weee, scetate, fa' 'mpresso.
-Che vvuò? Famme durmì 'n a' ppoco!

-No, no, scetate, mme serve cumpagnia e nu surzo d' acqua fresca.
Sto nervuso. Stanotte, p' o' cavere, nun’ aggiu chius' uogghijo!

-Azz! 'o ddice proprio tu, che si o' Sole!
Cca, si 'nce sta uno che s' adda llamentà so' propr' ijo, 
che t' aggia suppurtà da quando spunte, fino a' sera!

Wè, appena te scite, te presiente fora a' porta,
e, senza chiedere o' permesse, appicce pure 'e prete da’ casa mija!
Ed ijo resto llà, per ore e ore, co' ventaglio mmano.

-E 'gghià, nun fa' a' 'nfama, famme trasì nu poco,
famme 'na bella spremmuta co' e llimoni 'e Surriento.
Accussì, mme repiglio nu poco e ttorno a splendere cchiù fforte.

- Se se!!! Torna a splendere cchiù fforte!
Pecchè, si e llimone so' da' Sicilia nun va bbuono lo stesso?

E ghiammo belle, ijà, assiettete nu poco:
primma 'a limunata, po' na tazzulella 'e cafè
fatta c' 'a mano do' core e, pò,
(nun 'o ddicere a nisciuno, t' arraccumano)
pure 'na fetta ‘e pastiera, ca tenevo ‘astipata 
pe' mma mangià dummeneca.

-Madò, che delizia! Mmo sì ca s’ accummencia a rraggiunà!
Si proprio 'na bbona figliola! Viene ccà, te voglio abbraccià.

-Ma chi? Ma quanno maije? Ijo soffro o' cavere, nun ‘e capito?
Passa a Natale, quanno scenne 'a neve: 
priparo nu piatto 'e struffole pure pe' tte!