“NUN CERCO GRANDEZZE”   di Angela Quattromani

‘Na matina, ‘o Signore si scetaje cuntento.

Chiammava tutta ‘a ggente, dicenno:

-Jammo bello, allero allero, mettiteve in fila,

‘nce stanno regale pe’ tutte.

Ate, dono <<‘a Pacienza>>, a chist’ato, <<l’ Allegrezza>>.

A chillo, po’,<< ‘a Parola cunvincente>>.

O’ russo, invece, o’ dono ‘e <<‘Ncantà ‘a ggente>>.

S’ avvicinava o’ turno mije.

Chissà che mm’ ha stipato-, penzavo,

Quanno se ggiraje a’ parta mija

chiedennemo:-Etu, figliò, che vuò’?

Senz’ esitazione, jo rispunnietto:

-‘A capacità ‘e mm’ accuntentà ‘e chello che tengo.

O’ poco me bbasta. Nun cerco grandezze:

nu muorzo ‘e pane, ‘na funtanella cu’ ll’ acqua fresca,

‘o mare annanze a mme e manco o’ re è meglio e me.

A chillu punto, o’ Signore cantava e zumpava

e felice strillava:- M’ aspettave ca mme cercave

 chissà quali grandezze, putenno scegliere tu

e, invece, mm’ ‘e cercate ‘na cosa semplice,

chi tene ‘o core chino d’ ammore po’ apprezzà.

Allora-, diceva o’ Signore,

-l’ Umanità nun è proprio malamente

e se po’ salvà ancora, si dinte o’ core ‘e ‘na figliola

‘nce stanno chisti sentimente.

E, mentre parlava,

se levaje ‘a dinto o’ core suoje nu raggio ‘e sole

e, chianu chianu, teneramente, m’ accarezzaje

e mmo mettette dinto o’ core mije.